Habari
WAJUMBE WA KAMATI YA MTAKUWWA WATAKIWA KUSIMAMIA VYEMA UTEKELEZAJI WA MPANGO KAZI WA TAIFA WA KUTOKOMEZA UKATILI DHIDI YA WANAWAKE NA WATOTO
Na: Mwandishi Wetu, Kahama
Naibu Katibu Mkuu Ofisi ya Waziri Mkuu Kasper Mmuya amewataka Wajumbe wa Kamati ya MTAKUWWA ngazi ya Mkoa, Halmashauri, Kata na Kijiji/Mtaa kuhakikisha wanasimamia vyema utekelezaji wa Mpango Kazi wa Taifa wa kutokomeza ukatili dhidi ya Wanawake na Watoto ili kujenga jamii bora yenye usawa.
Hayo yameelezwa na Naibu Katibu Mkuu huyo wakati wa ziara yake ya Kikazi Mkoani Shinyanga kwa lengo la ufuatilia utekelezaji wa afua mbalimbali za Mpango Kazi wa Taifa wa kutokomeza ukatili dhidi ya Wanawake na Watoto (MTAKUWWA) zinazotekelezwa na Serikali kwa kushirikiana na Wadau mkoani humo.
Naibu Katibu Mkuu Mmuya alisema kuwa kama Taifa Serikali kwa kushirikiana na wadau waliandaa mpango kazi huo wa Taifa wa kutokomeza ukatili dhidi ya Wanawake na Watoto (MTAKUWWA) ili kukabiliana na changamoto za ulinzi zinazowakabili wanawake na watoto nchini, hivyo katika kutekeleza mpango huo kwa ufanisi ni vyema Wajumbe wa Kamati ya MTAKUWWA kuanzia ngazi Kitaifa na ngazi ya Mkoa, Halmashauri, Kata na Kijiji/Mtaa kuhakikisha wanasimamia vyema utekelezaji wa Mpango Kazi huo.
“Katika kusimamia vyema mpango kazi huu ni muhimu kila mjumbe akutambua eneo lake la utekelezeaji ili kila mdau anayehusika katika masuala ya kutokomeza ukatili dhidi ya Wanawake na Watoto wakawa na uelewa wa pamoja wa mpango kazi huo wa Taifa ili waweze kuzingatia usimamizi wa MTAKUWWA kwa kuwashirikisha wadau katika kutekeleza mpango kazi wa Taifa wa MTAKUWWA,” alisema Mmuya
Alifafanua maeneo hayo ya utekelezaji yaliyopo katika mpango kazi huo ambayo ni Kuimarisha Uchumi wa kaya; Mila na Desturi; Mazingira salama; Malezi, kuimarisha mahusiano na kuziwezesha familia; Utekelezaji na usimamizi wa Sheria; Utoaji huduma kwa waathirika wa ukatili; mazingira salama shuleni na stadi za maisha; na Uratibu, Ufuatiliaji na Tathmini.
Sambamba na hayo Naibu Katibu Mkuu Ofisi ya Waziri Mkuu Bw. Kasper Mmuya alipongeza Wilaya ya Kahama na Mkoa wa Shinyanga kwa ujumla kwa namna wanavyotekeleza afua mbalimbali za MTAKUWWA katika kutokomeza ukatili dhidi ya Wanawake na Watoto.
Aidha Naibu Katibu Mkuu Mmuya alitoa wito kwa Maafisa Ustawi wa Jamii kuimarisha ushirikiano na wadau katika kutekeleza kutekeleza afua mbalimbali za MTAKUWWA katika kutokomeza ukatili dhidi ya Wanawake na Watoto.
“Mkoa wa Shinyanga mnafanya vizuri katika kutokomeza matukio ya ukatili wa kijinsia na Watoto kupitia mpango mkakati wa mkoa ambao umekuwa chachu ya mabadiliko hayo. Niwapongeze pia wadau mmekuwa na ushirikiano mzuri na serikali,” alisema Naibu Katibu Mkuu Mmuya
Kwa upande wake Mkuu wa Wilaya ya Kahama Festo Kiswaga alisema kuwa Halmashauri hiyo imekuwa ikipambana kutokomeza ukatili dhidi ya wanawake na Watoto kwa kuhakikisha kila mdau na mratibu anatimiza wajiubu wake kwa ufanisi.
Akitoa neno la shukrani kwa Serikali Mmoja wa wanakikundi cha The Best Mwajuma Ramadhani ameishukuru serikali kwa kutambua wadau ambao wamekuwa na msaada mkubwa na unaowafikia moja kwa moja mabinti na waototo ambao wamekuwa wakiishi katika mazingira hatarishi.
“Wadau hawa wameweza kutujengea uwezo ambao hii leo tunauwezo wa kuanzisha biashara na shughuli ambazo zimetufanya tuondokane katika mazingira ya utegemezi kwa familia zetu sambamba na kuwa na ujasiri wa kutekeleza vitu kwa vitendo,” alisema Mwajuma
Katika ziara hiyo Naibu Katibu Mkuu Ofisi ya Waziri Mkuu Kasper Mmuya alitembelea Mahakama, Madawati ya Jinsia katika Vituo vya Polisi, Kituo cha Mkono kwa Mkono (One Stop Center) cha Shufa kinachotoa huduma jumuishi kwa waathirika wa ukatili. Aidha alitembelea shughuli za ujasiriamali zinazofanywa na mabinti na Mama wadogo waliopo chini ya miradi inayotekelezwa na wadau mbalimbali. Pia alikutana na kuzungumza na Kamati za Ulinzi wa Wanawake na Watoto.
MWISHO
