WANACHAMA 2,565 WAJITOKEZA KUMDHAMINI DKT. MAGUFULI RUANGWA

 

WAZIRI MKUU Kassim Majaliwa ameongoza wanachama 314 wa Chama Cha Mapinduzi (CCM) wilayani Ruangwa, mkoani Lindi kujaza fomu za kumdhamini Rais Dkt. John Pombe Magufuli ili aweze kuteuliwa kugombea tena nafasi ya urais.

Idadi hiyo inafanya jumla ya wanachama waliojitokeza kumdhamini Rais Dkt. Magufuli katika wilaya hiyo kufikia 2,565 baada ya wanachama wengine 2,251 kujaza fomu hizo jana (Jumamosi, Juni 20, 2020) za kumdhamini kiongozi huyo.

Waziri Mkuu ameongoza wanachama hao wa CCM leo (Jumapili, Juni 21, 2020) katika ofisi za CCM wilayani Ruangwa. Amewasihi wananchi hao waendelee kuwa na imani na Dkt. Magufuli pamoja na Serikali anayoiongoza.

“Mheshimiwa Rais Dkt. John Pombe Magufuli ametekeza ahadi zote alizoziahidi ikiwemo ya kuwatumikia Watanzania wote hasa wanyonge. Amewatumikia Watanzania wote bila ya kujali itikadi zao za kisiasa na hata za kidini. Nawapongeza wana CCM wenzangu mliojitokeza kumdhamini Rais wetu.”

Waziri Mkuu ameongeza kuwa: “Kitendo mlichokifanya leo kinaonyesha shukrani kubwa kwa Mheshimiwa Dkt. John Pombe Magufuli ambaye wakati wote ameonesha mapenzi makubwa kwetu na Watanzania wote kwa ujumla.”

Amesema kwa sasa wilaya ya Ruangwa imepata mabadiliko makubwa kimaendeleo ambayo hapo awali hayakuwepo kama nishati ya umeme, maji ambayo kwa sasa kila kijiji kina kisima, shule za msingi katika kila kijiji na sekondari kwenye kata zote pamoja na barabara za lami katika mitaa ya mji wa Ruangwa. “Haya yote, aliyefanya ni Dkt. Mgufuli.”

Kwa upande wake, Mwenyekiti wa CCM mkoa wa Lindi, Fadhili Juma amesema wanaCCM wa mkoa huo wapo bega kwa bega na Rais Magufuli na kwamba watahakikisha anapata kura nyingi katika uchaguzi ujao.

-ends-