MAJALIWA: TUTAENDELEA KUDHIBITI MATUMIZI YA FEDHA ZA UMMA

*Asema lengo ni kuendelea kujenga miradi ya kimkakati kwa maendeleo ya watu

 

WAZIRI MKUU Kassim Majaliwa amesema Serikali itaendelea kudhibiti matumizi ya fedha za umma ili iweze kuendelea na ujenzi wa miradi ya kimkakati zikiwemo bandari kwa lengo la kuboresha maendeleo ya wananchi wake.

Pia, Waziri Mkuu amesema changamoto ya usafirishaji wa mizigo na abiria kati ya Tanzania na Jamhuri ya Kidemokrasia ya Congo (DRC) itakuwa historia baada ya kuboreshwa na kujengwa kwa miundombinu ya bandari katika wa Ziwa Tanganyika ukiwemo upanuzi wa bandari ya Kasanga.

Waziri Mkuu aliyasema hayo jana jioni (Jumapili, Julai 5, 2020) alipozungumza na wananchi baada ya kuweka jiwe la msingi kwenye mradi wa upanuzi wa bandari ya Kasanga wilayani Kalambo mkoani Rukwa. Mradi huo unagharimu zaidi ya sh. bilioni 4.7.

Waziri Mkuu ambaye yuko mkoani Rukwa kwenye ziara ya kikazi ya siku moja, alisema upanuzi wa bandari hiyo utawezesha mizigo inayokwenda Congo ifike kwa wakati kwa sababu itasafirishwa moja kwa moja bila kupitia nchi nyingine kama ilivyo sasa, ambapo madereva wanalazimika kupita kwenye mataifa mengine na kutumia muda mrefu.

“Mradi huu ukikamilika utaongeza pato la mwananchi mmoja mmoja pamoja na Taifa kwa ujumla. Rais Dkt. Magufuli amedhamiria kuboresha maendeleo ya wananchi nchi nzima ikiwemo na wilaya hii ya Kalambo. Ujenzi wa miradi hii unatoa fursa za ajira kwa wananchi, hivyo zichangamkieni.”

Vilevile, Waziri Mkuu alisema mapambano dhidi ya vitendo vya rushwa bado yanaendelea nchini, hivyo mtu yeyote atakayebainika anajihusisha na masuala hayo, akamatwe na achukuliwe hatua za kisheria kwa sababu rushwa ni adui wa haki.

Pia, Waziri Mkuu aliendelea kuwakumbusha watendaji ndani ya Serikali wahakikishe wananchi wanapofika katika maeneo yao ya kazi wanawapokea, wanawasikiliza na kuwahudumia bila ubaguzi. “Hatuangalii sura wala kabila, yeyote atakayekanyaga kwenye maeneo yenu, ahudumiwe ipasavyo,” alisisitiza.

Kwa upande wake, Waziri wa Ujenzi, Uchukuzi na Mawasiliano, Mhandisi Isack Kamwelwe alisema Tanzania na Congo zimeunganishwa na Ziwa Tanganyika, na kwamba usafiri wa barabara uliokuwa unatumika awali uliyalazimu malori ya mizigo yapitie nchi nyingine na yachelewe kufika.

Alisema kukamilika kwa upanuzi wa bandari hiyo pamoja na ujenzi wa barabara kwa kiwago cha lami kutoka Sumbawanga hadi Kasanga, kutarahisisha usafirishaji wa abiria na mizigo kuingia nchini Congo moja kwa moja.

Waziri Kamwelwe alisema kuwa, awali kulikuwa na changamoto ya barabara hali iliyosababisha meli zinazotia nanga bandari ya Kasanga zisubiri mizigo kwa muda mrefu kutokana na ubovu wa barabara na sasa tayari Serikali imeitatua kwa kuijenga kwa kiwango cha lami.

Awali, akitoa taarifa ya maendeleo ya mradi huo, Kaimu Katibu Mkuu Wizara ya Ujenzi, Uchukuzi na Mawasiliano anayeshughulikia Uchukuzi, Mhandisi Thomas Ngulima alisema mradi huo umeanzishwa ili kuongeza ushindani na tija katika shughuli za kibandari Kusini mwa Ziwa Tanganyika.

Alisema mradi huo unahusisha upanuzi mkubwa wa gati ilililopo sasa lenye urefu wa mita 20 lifikie mita 120, ambazo zitawezesha kuhudumia meli mbili hadi sita kwa wakati mmoja. Kazi nyingine ni ujenzi wa miundombinu ya bandari ikiwemo jengo la kupumzikia abiria, mgahawa na nyumba za watumishi.

Mhandisi Ngulima alisema mradi huo unaojengwa na kampuni ya Inter-Consult Limited umefikia asilimia 70 na unatarajiwa kukamilika Septemba mwishoni na kwamba utafungua na kuboresha biashara ya mazao ya chakula katika nchi za DRC, Burudi na Zambia.

Aliongeza kuwa, ujenzi wa barabara ya kimkakati inayoanzia Manispaa ya Sumbawanga hadi Kasanga (km. 107), pamoja na upanuzi wa bandari unaoendelea, utawezesha mtiririko wa shehena za saruji, makaa ya mawe, chokaa na sabuni ziongezeke hivyo kukuza uchumi wa wananchi na Taifa.

-ends-