TUTAISAIDIA BURUNDI UANACHAMA WA SADC - MAJALIWA

WAZIRI MKUU Kassim Majaliwa amesema Tanzania itaendelea kuisaidia nchi ya Burundi ili ifanikiwe katika azma yake ya kutaka kuwa mwanachama wa Jumuiya ya Maendeleo Kusini mwa Afrika (SADC) kama ilivyoombwa na aliyekuwa Rais wa nchi hiyo, marehemu Pierre Nkurunziza.

Waziri Mkuu aliyasema hayo jana (Ijumaa, Juni 26, 2020) alipozungumza kabla ya mazishi ya Rais Nkurunziza yaliyofanyika kwenye uwanja wa Ingoma uliopo Gitega nchini Burundi, Mheshimiwa Majaliwa alisema ameshiriki mazishi hayo kwa niaba ya Rais Dkt. John Pombe Magufuli.

“Marehemu Rais Pierre Nkurunziza alitamani sana kukabidhi madaraka huku akiwa ametimiza kiu yake ya kutaka Burundi iwe mwanachama wa SADC, jambo ambalo halikuwezekana. Naamini Mheshimiwa Rais utalisimamia suala hilo hadi litimie”.

Alisema Rais Dkt. Magufuli amemtuma afikishe salamu za pole kwa mke na familia ya marehemu, Rais wa Burundi na wananchi wote kufuatia kifo cha aliyekuwa Rais wa nchi hiyo, marehemu Pierre Nkurunziza kilichotokea Juni 9, 2020 katika hospitali ya Natwe Turashoboye, mkoani Karuzi, mashariki mwa Burundi.

Waziri Mkuu alisema Tanzania na Burundi ni ndugu na anaamini undugu na mshikamano huo utaendelea kuwepo hata baada ya kifo cha Rais Nkurunziza ambaye alitoa mchango mkubwa katika kuuimarisha mshikamano huo.

Alitumia fursa hiyo kuwasihi wananchi wa Burundi wampe ushirikiano Rais wao mpya, Evariste Ndayishimiye, kama walivyofanya kwa mtangulizi wake ili aweze kuliongoza Taifa hilo vizuri.

Naye, Rais wa Burundi, Evariste Ndayishimiye alisema Serikali yake itayaenzi na kuyaendeleza mema yote yaliyofanywa na marehemu Nkurunziza na aliwashukuru viongozi wote kutoka nje ya nchi yake ambao walishiriki mazishi hayo.

Mazishi hayo pia yalihudhuriwa na Rais Mstaafu wa Awamu ya Nne, Dkt. Jakaya Kikwete, mkewe Mama Salma Kikwete na Katibu Mkuu wa Wizara ya Mambo ya Nje na Ushirikiano wa Afrika Mashariki, Brigedia Jenerali Wilbert Ibuge.

Alipowasili kwenye uwanja wa ndege wa Kimataifa wa Bujumbura jana asubuhi Juni 26, 2020, Mheshimiwa Majaliwa alipokelewa na Waziri Mkuu wa Burundi, Prosper Bazombaza. Baada ya mazishi hayo Mheshimiwa Majaliwa alikutana na kufanya mazungumzo na Rais wa Burundi kabla ya kurejea nyumbani.

-ends-